දේශපාලන පක්ෂ මැයි දින රැලි සහ පෙළපාළි වෙනුවෙන් වෙන් වැය කළ මුදල් සම්බන්ධයෙන් මෙරට ජාතික පුවත්පතක් තොරතුරු සොයා බලා තිබෙනවා.
එහි දී අනාවරණ වී ඇත්තේ, එම පක්ෂ විසින් රුපියල් කෝටි දෙසීයකට ආසන්න මුදලක් මෙවර වැය කර ඇති බවයි.
රට තුළ පවතින උද්ධමනකාරී තත්වය හේතුවෙන් මෙතරම් මුදලක් වැය කිරීමට සිදු වූ බව ද දේශපාලන පක්ෂ නායකයන් ප්‍රකාශ කළා.
මෙරට මැයි රැළි ඉතිහාසයේ වැය වූ අධික මුදල මෙය වන බවයි ඔවුන් අවධාරණය කර ඇත්තේ.
එහි දී එම පක්ෂ වැඩි මුදලක් වැය කර ඇත්තේ, මැයි රැලිවලට ජනතාව රැගෙන ඒම සඳහා ප්‍රවාහන වියදම් වෙනුවෙන්.
වේදිකා සකස් කිරීම, ශබ්ද විකාශන යන්ත්‍ර ලබා ගැනීම සහ ආලෝක කරන කටයුතු, රැස්වීම් අවට ප්‍රදේශ සැරසිලි කිරීම, පාක්ෂිකයන්ට ආහාර පාන ලබාදීම යනා දී කටයුතු සෙසු වියදම් වනවා.
මැයි රැලි සහ පෙළපාළි සංවිධාන කිරීම සඳහා බොහෝ දේශපාලන පක්ෂ අරමුදල්වලින් වැඩිම වියදමක් දරා තිබෙනවා.
ආසන සංවිධායකවරුන් සහ විවිධ දානපතීන් ද මැයි රැලි සංවිධාන කිරීමට උදව් කළ බව සඳහන්.
මේ සම්බන්ධයෙන් ජනතා විමුක්ති පෙරමුණේ ප්‍රධාන ලේකම් ටිල්වින් සිල්වා මහතා ද සිය අදහස් පළ කළා.
එහි දී ඔහු ප්‍රකාශ කළේ, මැයි දින සැමරුමට මෙවර වැඩිම මුදලක් වැය කිරීමට සිදුවූ බවයි.
ජාතික ජන බලවේගයේ මැයි දින රැස්වීම් දිස්ත්‍රික්ක හතරක පැවැත්වුණා. එම නිසා දැරීමට සිදු වූ වියදම ඉහළ ගිය බවයි, ඔහු අවධාරණය කළේ.
වේදිකාව, ශබ්ද විකාශන, ආලෝක පද්ධති සහ සුළු ප්‍රචාරණ කටයුතු කිහිපයකට පමණක් පක්ෂ මූලස්ථානය වියදම් දරා තිබුණා.
සෙසු වියදම් සියල්ල දිස්ත්‍රික්කවල සංවිධායකවරුන් ඒකාබද්ධවී දැරූ බවයි ටිල්වින් සිල්වා මහතා වැඩිදුරටත් කියා සිටියේ.
