ජාතික ජන බලවේගය බලයේ සිටියා නම් අයි.එම්.එෆ්. එකට නොගොස් ඉතාම පහසුවෙන් අර්බුදය විසඳා ගත හැකි ඉඩකඩක් ලෝකය තුළ විවර වෙලා තිබූ බව ජාතික ජන බලවේග ආර්ථික කවුන්සිලයේ සාමාජික මහාචාර්ය අනිල් ජයන්ත ප්‍රනාන්දු පවසයි.
ජාතික ජන බලවේගයේ ආර්ථික කවුන්සිලයේ මාධ්‍ය හමුවේදී ඔහු මේ අදහස් පළ කළේය.
එහිදී අනිල් ජයන්ත ප්‍රනාන්දු මහතා මෙසේද කීය.
අද වන විට රටේ ආර්ථික තත්ත්වය ඇති වුණේ කොහොමද? එයට වගකිවයුත්තේ කවුරුද? එය විසඳාගත යුත්තේ කෙසේද? යන්න පිළිබඳ විධිමත් සාකච්ඡාවක් අරඹනවා වෙනුවට ඒ සියල්ලට වගකිවයුතු කණ්ඩායම විසින්ම මේ ආර්ථික අර්බුදයෙන් ගොඩ යන්න තිබෙන එකම පාර අයි.එම්.එෆ්. බවත්, අයි.එම්.එෆ්. එක සමඟ ගනුදෙනු කිරීමට සුදුසු කණ්ඩායම එම කණ්ඩායම බවත් එම ගනුදෙනු ඉදිරියට ගෙනයෑම තුළින් මෙම ප්‍රශ්න විසඳිය හැකි බවත් පවසමින් සමාජය තුළ මිථ්‍යාවක් හදාගෙන යනවා. ඒ හමුවේ මහජනතාව මුහුණ දෙන සත්‍ය තත්ත්වය පැහැදිලි කරදිය යුතුව තිබෙනවා.
පසුගිය දශක දෙකේදී මේ රට පාලනය කළේ ජන බලවේගයේ ආණ්ඩුවක් නම්, මෙවන් අර්බුදයකට රටට මුහුණ පෑමට සිදුවන්නේ නැහැ. රට විශාල සංවර්ධන ප්‍රමාණයක් අත්පත් කර ගන්නවා වගේම අයි.එම්.එෆ්. කතාවක් අදාළ වෙන්නේත් නැහැ. එයාලා පෙන්වනවා, ඔවුන්ගේ දූෂිත ක්‍රමය තුළ තිබෙන්නේ එකම විසදුමක් බව. එම විසදුම තිබෙන්නේ එයාලා ළඟ පමණක් බව. ණය හිමියන් සමග විධිමත් සාකච්ඡාවකට යන්න තිබුණා.
එසේ යෑමට හැකියාව තිබුණේ වංචා, දූෂණවල නොයෙදුණු කණ්ඩායමකට පමණයි. මෙහිදී වර්තමානයේ තිබෙන ප්‍රශ්නයට අයි.එම්.එෆ්. එකට යෑමට සිදුවී තිබෙනවා. ඒ නිසා මේ අවස්ථාවේ ජාතික ජන බලවේගය කරන්නේ මොකක්ද? ඇත්ත වශයෙන් අපට මේ මොහොතේ එයින් එළියට එන්න හැකියාවක් නැහැ. ගිවිසුම පරිදි අයි.එම්.එෆ්. එක ආණ්ඩුවට ඉදිරිපත් කළේ, මූල්‍ය ස්ථාවරත්වය ඇතිකර ගැනීමට, “සමස්ත ආර්ථික ස්ථාවරත්වය ඇති කර ගැනීමට, ඔබට ලැබෙන ආදායම කළමනාකරණය කරගන්න. ඔබේ රට දියුණු කර ගැනීමට ඔබේ ප්ලෑන් එකක් අරගෙන එන්න.” කියන එක.
ආණ්ඩුව ඒ නිර්ණායක අරගෙන රට ගොඩ ගන්නා සැලසුම වෙනුවට එමඟින් ඇතිවන සියලු බරපැන මහජනතාව වෙත පටවන තත්වයකට පත්කර තිබෙනවා. අයි.එම්.එෆ්. ආදායම කළමනාකරණය කරගන්න කියන කොට කරන්න ඕනෙ ආදායම උපයන මාර්ග වැඩිදියුණු කරගන්නා එක. ආදායමේ නාස්තිය තිබෙන තැන් වෙනස් කර ගන්න ඕනෑ. ඒ වෙනුවට ආණ්ඩුව කර තිබෙන්නේ ආදායම විනාශ කර ගැනීමත් සාමාන්‍ය ජනතාවට බදුබර පැනවීමත් පමණයි. වංචා දූෂණ සිදුවීම නවතා දැමීමත් කර නැහැ.
අපිට මේ ප්‍රශ්නයේදී මහජනතාවගෙන් වරමක් ඉල්ලන්න සිදුවෙනවා. නැවතත් අයි.එම්.එෆ්. එකත් එක්ක සාකච්ඡා කර, විශේෂයෙන්ම ඉහළ මට්ටමේ තිබෙන විචල්‍යයන් පාලනය කරන්නෙත්, ආණ්ඩුවේ පිස්කල් කළමනාකරණය කරන්නේත් කොහොමද කියා සැලසුම් කිහිපයක් සකස් කොට තිබෙනවා. විශේෂයෙන් ආණ්ඩුවේ ආදායම සකස් කර ගන්නා ආකාරය, විදේශ විනිමය උපයා ගන්නා ආකාරය කොහොමද කියන එක.
ඒ වගේම මේ ගත්ත ණය පිළිබඳව විමර්ශනයක් කොට, ඒ පිළිබඳ පරීක්ෂණ වාර්තාවක් සමඟ අනාගතයේදී රටේ ආර්ථිකය දියුණු කරන සංවර්ධන සැලැස්මක් එක්ක ඔවුන් එක්ක නැවත සාකච්ඡාවක් කරන්න අපට පුළුවන්කම තිබෙනවා. නැවත සාකච්ඡාවක් කරන්නේ මිනිසුන්ට ඇති වී තිබෙන ගැටලු අයින් කරලා සාමූහිකව ඉදිරියට ඒම වෙනුවෙනුයි. අපි මීට පෙරත් අයි.එම්.එෆ්. එක හමුවුණා. අපේ ස්ථාවරය පැහැදිලි කළා. ඔවුන් සාකච්ඡා කරන්න එකඟතාවන් ලබාදුන්නා. නැවතත් අපි අයි.එම්.එෆ්. සමඟ සාකච්ඡාවක් කරන්න බලාපොරොත්තු වෙනවා.
මෙහි සැබෑ වගඋත්තරකරුවන් හංගලා ආණ්ඩුව ඉදිරියට යන්න උත්සාහ කළත් එය අමාරුවී තිබෙනවා. අයි.එම්.එෆ්. එක නැවත ආණ්ඩුකරණය පිළිබඳ කරුණු සොයා බලන්නත් විශ්ලේෂණය කරන්නත් කටයුතු කළා. එහිදී ආණ්ඩුකරණයේ තිබෙන දුර්වලතාවන්, වංචාවට පාර කපන හැටි, වංචාවට සම්බන්ධ වෙන හැටි විස්තරාත්මකව ඉදිරිපත් කර තිබෙනවා. 2023 වාර්තාව ඉදිරිපත් වුණත් එහි ප්‍රායෝගික ක්‍රියාකාරකම්වලට ගොස් නැහැ. නීතිය සම්මත කරගැනීම් වගේ දේ කළත් වැඩක් නැහැ, නීතිය ක්‍රියාත්මක වෙන්නේ නැතිනම්. අනෙක් ආණ්ඩු වගේම එ.ජා.ප. ආණ්ඩුවත් වංචා, දූෂණවල යෙදුණා. ඒ වගේම මහ බැංකු බැදුම්කර වංචාවේ මතුපිටින් ගත් විට ලියවිලිවලින් බැලූවිට හැමවිටම නීතිය ඇතුළෙමයි වංචා කර තිබෙන්නේ.
2015 ආණ්ඩුව කාලයේ අර්බුදයක් ඇති වෙනකොට විදේශ විනිමය සොයන්න අපනයනය වැඩිකරන්න ඕනෑ. අපනයන වැඩි කරන්න, නිෂ්පාදනය වැඩිකොට විවිධාංගීකරණයකට යන්න ඕනෑ. ඒ වෙනුවට මේ ආණ්ඩු යම් උපක්‍රම පාවිච්චි කරනවා. එහි ප්‍රධාන එකක් තමයි ප්‍රතිඅපනයනය කියන වංචාව හංගන එක. කරුංකා, ගම්මිරිස්, තේ, ප්‍රතිඅපනයනය කිරීම ඒ යටතේ සිදුකළා. ලෝකයේ අංක එකේ තේ අපනයනය කළ ලංකාව ප්‍රතිඅපනයනය යටතේ අංක 05ට වැටුණා. ඒ ආණ්ඩු මේ වංචාව දිගටම කළා. අද මුළු රටක්ම අර්බුදයක ඉන්නේ. හැබැයි ආණ්ඩුව නැවතත් ඒ තැනටම යන්න උත්සාහ කරනවා.
– Mawbima
