කතානායක අශෝක රන්වලගේ අධ්‍යාපන සුදුසුකම් පිළිබඳ විමර්ශනයක් සිදු කරන්න යැයි නව ජනතා පෙරමුණේ මහරගම සංවිධායක දිනේෂ් අබේකෝන් අපරාධ පරීක්ෂණ දෙපාර්තමේන්තුවට අද (දෙසැ. 12) පැමිණිල්ලක් කර තිබේ.
දසවන පාර්ලිමේන්තුවේ වත්මන් කතානායක විසින් මැතිවරණයට පෙර සහ පාර්ලිමේන්තු කටයුතු තුළ ඉදිරිපත් කරනු ලැබ ඇති අධ්‍යාපන සුදුසුකම්හි නිරවද්‍යතාව පිළිබඳ සැකයක් පොදු ජනතාව අතර මේ වනවිට දැඩි ලෙස පවතින බව නව ජනතා පෙරමුණේ සංවිධායකවරයා පැවසීය.
පැමිණිල්ල සිදු කර අපරාධ පරීක්ෂණ දෙපාර්තමේන්තුවෙන් පිටතට පැමිණි අවස්ථාවේදී මාධ්‍ය වෙත අදහස් දක්වමින් ඔහු මේ බව සඳහන් කළේ ය.
දස වන පාර්ලිමේන්තුවේ අභිනව කතානායකවරයා ලෙස අශෝක සපුමල් රන්වල තේරී පත් වූයේ පසුගිය නොවැම්බර් 21 වන දා ය.
අශෝක රන්වල කතානායක ධූරයට පත් කෙරුණේ අග්‍රාමාත්‍ය ආචාර්ය හරිනි අමරසූරියගේ හා අමාත්‍ය විජිත හේරත්ගේ යෝජනා ස්ථීරත්වයෙනි.
කතානායකවරයාට ආචාර්ය උපාධියක් හිමි නැති බවට විවිධ මත පළ වූ අතර එය සමාජ මාධ්‍යයේ දැඩි සාකච්ඡාවකටද බඳුන් විය.
ඔහුට සැබැවින් ම එවැනි උපාධියක් හිමි ද නැද්ද යන්න ගැන කඩිනමින් ප්‍රසිද්ධ ප්‍රකාශයක් කළ යුතු බවට ජාතික ජන බලවේගයට මතවාදීව සහාය දැක්වූ පිරිස් පවා සමාජ මාධ්‍යයේ සිය අදහස් පළ කරන්නට වූ අතර කැබිනට් තීන්දු දැනුම් දෙන මාධ්‍ය හමුවේදී කැබිනට් මාධ්‍ය ප්‍රකාශක ඇමති නලින්ද ජයතිස්ස පැවසුවේ, කතානායකවරයා නුදුරේ ම එවැනි ප්‍රකාශයක් කරනු ඇති බව ය.
