ටෙස්ට්, එක්දින හෝ විස්සයි 20 කණ්ඩායම් අතුරින් කුමන කණ්ඩායමකට ක්‍රීඩා කිරීමට තමාට ආරාධනා ලැබුණත් ශ්‍රී ලංකා ක්‍රිකට් අභිවෘද්ධිය වෙනුවෙන් ඊට ඉදිරිපත්වීමට තමා සූදානමින් පසුවන බව ශ්‍රී ලංකා හිටපු ක්‍රිකට් නායකයකු වන ඇන්ජලෝ මැතිව්ස් පවසයි.
ටෙස්ට් තරගයක දස්කම් දැක්වුවත් එපමණින් එක්දින හෝ විස්සයි 20 තරගාවලියන් නියෝජනය කිරීමටවත් එක්දින හෝ විස්සයි 20 තරගාවලියන් හි දස්කම් පෙන්වූ පමණින් ටෙස්ට් කණ්ඩායමක් නියෝජනය කිරීමවත් සුදුසු යැයි තමා විශ්වාස නොකරන බව පවසන ඇන්ජලෝ මැතිව්ස් තුන් ඉරියව් ක්‍රීඩකයකු ලෙස ශ්‍රී ලංකාව නියෝජනය කිරීමට තමා අපේක්ෂාවෙන් පසු වන බව ද පැවසීය.
මෙවර ලංකා ප්‍රිමියර් ලීග් තරගාවලියේ තමා නියෝජනය කරන බී ලව් කැන්ඩි කණ්ඩායම පිළිබඳව අදහස් දැක් වූ මැතිව්ස් මෙම තරගාවලියේ ප්‍රථම තරග දෙක කොළඹදී නරක අයුරින් පරාජයට පත්වුවත් ඉන්පසු තරග හතරම පහසුවෙන් ජය ගැනීමේ ගෞරවය කණ්ඩායමේ නායකයාටත් ප්‍රධාන පුහුණුකරු ඇතුළු සෙසු කාර්යය මණ්ඩලයටත් අයත් විය යුතු බව ද සඳහන් කළේය.
සහාය කාර්යය මණ්ඩලය උපක්‍රම වෙනස් කරමින් ක්‍රියාකාරී ලෙස දැක් වූ සහාය අවසාන තරග හතරේ ප්‍රතිඵල මඟින් ඔප්පු වන්නේ යැයි ද ඔහු පැවසීය.
“මේ තරගාවලිය ආරම්භයේදී අපගේ කණ්ඩායමේ නායක වනිඳු හසරංග මගෙන් ඉල්ලීමක් කළා, මුලින්ම පන්දු යැවීම ආරම්භ කිරීමට ඉදිරිපත් වන ලෙසට. තරග ආරම්භයට වැඩි දිනක් නොතිබුණත් මා හොඳින් පුහුණුවක් ලබා එය ඉටුකරන බව පැවසුවා. නායකයාගේ සහ ප්‍රධාන පුහුණුකරුගේ ඉල්ලීම ඉටුකිරීමෙන් මා හට කණ්ඩායමට තුන් ඉරියව්වේම දායකත්වය දැක්වීමට අද අවස්ථාව උදා වී ඇතැයි” මැතිව්ස් කියා සිටියේය.
මැතිව්ස් මේ තරගයේදී කැන්ඩි කණ්ඩායම වෙනුවෙන් පන්දු 18කදී ලකුණු 22ක් රැස්කර පසුව ලකුණු දහයකට කඩුලු තුනක් දවා තුන්ඉරියව් දක්ෂතා දැක්විය.
