ටික්ටොක් සමාජ මාධ්‍ය යෙදුම තහනම් කිරීමේ පනතක් අමෙරිකා එක්සත් ජනපද නියෝජිත මන්ත්‍රී මණ්ඩලය විසින් සම්මත කරනු ලැබ ඇත.
එක්සත් ජනපද නායකත්වය ගැන සැකය වැපිරීමට සහ අමෙරිකානු ප්‍රජාතන්ත්‍රවාදය අඩපණ කිරීමට චීන රජය ටික් ටොක් යෙදුම භාවිත කරන බවට එක්සත් ජනපද බුද්ධි අංශ එරට රජයට අනතුරු අඟවා තිබේ.
මේ අනුව චීන සමාජ මාධ්‍ය වේදිකාවක් වන ටික්ටොක්, අමෙරිකාවේ ජාතික ආරක්ෂාවට තර්ජනයක් බැවින් එය එරට තුළ තහනම් කිරීමට නියෝජිත මන්ත්‍රී මණ්ඩලය තීන්දු කර ඇත.
ජනාධිපති ජෝ බයිඩන්ගේ සහ සෙනෙට් සභාවේ අත්සනින් පසු පනත අමෙරිකාව තුළ බලාත්මක වීමට නියමිත බව විදෙස් මාධ්‍ය වාර්තා කර තිබේ.
මෙම පනත සෙනෙට් සභාවෙන් අනුමත කළහොත් ඊට ඉක්මනින් අත්සන් කරන බව අමෙරිකානු ජනාධිපති ජෝ බයිඩන් පවසා ඇති අතර එක්සත් ජනපදයේ ටික්ටොක් තහනම් වීම ඔස්සේ චීන-අමෙරිකා සබඳතා පළුදු වීමට ඉඩකඩ පවතින බව ජාත්‍යන්තර මාධ්‍ය පෙන්වා දෙයි.
ටික්ටොක් යෙදුමේ හිමිකාරිත්වය බයිට් ඩාන්ස් (Byte dance) නමැති චීන සමාගම සතු වන අතර මෙම සමාගමේ කොටස් විකිණීමට අමෙරිකානු රජය එම සමාගමට මාස 6 ක කාලයක් ලබා දී ඇති අතර නැතහොත් යෙදුම එක්සත් ජනපද තුළ අවහිර කරනු ඇතැයි සඳහන් ය.
මිලියන 150ක ටික්ටොක් පරිශීලකයින්ගේ පෞද්ගලික දත්ත මෙම බයිට් ඩාන්ස් සමාගමේ සේවකයින් හෝ වෙනත් බාහිර පාර්ශව වෙත යාමේ ඉඩකඩ අහුරා ඇති බවට ටික්ටොක් සමාගමේ ප්‍රධාන විධායක ෂූ සී චූ සහතික කර ඇත.
මෙම ටික්ටොක් තහනම ඔස්සේ අමෙරිකානුවන්ගේ මානසික යහපැවැත්ම වැඩිදියුණු වනු ඇති බවට ද මත පළ වී තිබේ.
නමුත් ටික්ටොක් ඔස්සේ පුවත් සහ තොරතුරු පහසුවෙන් දැනගත හැකි බව ත් තරුණ අමෙරිකානුවන් අතර ප්‍රසිද්ධ මෙම යෙදවුම තහනම් නොකළ යුතු බව ත් වයස අවුරුදු 20 පසුවන අමෙරිකානු තරුණියක ඩේලි මේල් වෙත පවසා ඇත.
ඇතැම් අමෙරිකානුවන් පවසන්නේ, ට්‍ර්ම්ප් බලයට පැමිණීමෙන් පසු අමෙරිකානුවන්ට යළි ටික් ටොක් ලබා දෙනු ඇති බව ය.
ටික්ටොක් තහනම මගින් “ඇමෙරිකානුවන්ගේ සතුරා වන ෆේස්බුක්” සමාගමට වාසි අත්කරදීමක් සිදුවන බව මේ ගැන අදහස් දක්වන ජනපති අපේක්ෂක ඩොනල්ඩ් ට්‍රම්ප් පවසයි.
